भारतं ३२ अर्ब तका बिल
येँ (सन्ध्या टाइम्स)/ गुगुं नं हालतय् माओवादीयात सरकारय् हयेगु प्रतिवद्धता भारत भ्रमणय् वनाच्वंम्ह प्रधानमन्त्री माधव नेपालं प्वंकादीगु दु ।
थौं सुथय् भारतय् थः च्वनाच्वंगु होटलय् जूगु पत्रकार मुँज्याय् न्ववायेगु झ्वलय् वय्कलं उगु प्रतिवद्धता प्वंकादीगु खः ।
माओवादीयात सरकारं पिने तये मजिउगु खँ कनादिसें वय्कलं माओवादीयात सरकारय् हयाः संविधान दयेकेगु व शान्ति प्रक्रियायात निष्कर्षय् थ्यंकेगु खँ नं कनादीगु दु।
थ्वहे झ्वलय् वय्कलं थौं भारतीय अर्थ मन्त्री प्रणव मुखर्जी व गृहमन्त्री पी चिडम्बरयात नापलानाः खँल्हाबल्हा यानादीगु दु ।
उगु इलय् भारतीय अर्थमन्त्री मुखर्जीं नेपाःयात ३२ अर्ब तका दां ग्वाहालि यायेगु घोषणा नं यानादीगु खः ।
अथे हे भारतीय गृहमन्त्रीलिसे जूगु खँल्हाबल्हाय् नेपाः व भारत निगुलिं देय्या सुरक्षा कडा यायेगु बारे सहलह जूगु खः। उगु इलय् भारतीय गृहमन्त्रीं भारतया सिमानाय् सुरक्षा कडा यायेत थःपिं तयार दुगु व नेपालं नं उकिया निंतिं पहल यायेमाःगु खँ धयादीगु दु ।
