विशेष सुरक्षा योजना जाति व समुदाय प्रति लक्षित मदु : गृहमन्त्री

गृहमन्त्री भीम रावलं विशेष सुरक्षा योजना छुं नं जाति व समुदाय प्रति लक्षित मजूगु खँ धयादीगु दु ।

सरकारया विशेष सुरक्षा योजनाया प्रारम्भिक चरण अन्तर्गत येँय् शुक्रवाः ग्वसाःग्वःगु सुरक्षा सम्बन्धी क्षेत्रीय सम्मेलनया उल्लेज्या यानादिसें मन्त्री रावलं कानुन व राष्ट्रिय अखण्डताया रक्षा यायेत हःगु सुरक्षा योजना बारे छुं नं शंका मयायेत इनाप यानादिल ।

वयेकलं थंज्याःगु सुरक्षा योजना कानुन उल्लंघन याइपिनिगु निंतिं जूगु धयादिसें छुं नं जाति व समुदाय प्रति लक्षित मजूगु धयादिल । अथेहे वयेकलं कानुनया पालना याइवलय् प्रशासन व सुरक्षा निकाययात दबाब बीगू राजनीतिक शक्ति नपा छुं नं सम्झौता मयाइगु धयादिल । वयेकलं अज्याःगु सम्झौता मयायेत थः मातहतया निकाययात निर्देशन बियादिल ।

बागमति अञ्चलया दक्वं व जकपुर, दोलखा व रामेछापया जिल्ला प्रमुख अधिकारी, प्रहरी व सशस्त्र प्रहरीया प्रमखुतय्सं ब्वति काःगु सम्मेलनय् गृहमन्त्रीं धयादिल, 'सुरक्षा प्रशासनया छिकपिंत कानुनया रक्षा याइगु ईलय् दबाब वइसाः जि गृहमन्त्रीया रुपय् आदेश बी अज्याःगु दबाबया जी पाखे छ्वयादिसं, उकीया सामना यायेगु जिम्मा जिं काये ।

सम्मेलनय् गृह राज्यमन्त्री मोहम्मद रिजवान अन्सारीं प्रशासन व सुरक्षा निकाययं न्हापा याःगु ज्या प्रशंसनीय जुसां उली जक पर्याप्त मजूगु धयादिल । वयेकलं झी विशिष्ट परिस्थिति दुगुलिं यक्व सम्भावना दुगु तर दण्डहिनता अन्त्य यायेमफुसाः झीत उगु ह्वताः सदुपयोग यायेत थाकुइगु धयादिल । वयेलकं कानुन पालना याकीगु ईलय् स्वयम थ:पिं नं अनुशासित जुइत सुरक्षा निकाययात निर्देशन बियादिल ।