सुजाता बारे मन्त्रीतय् बिस्कं बिस्कं धापू
प्रधानमन्त्रीया भारत भ्रमण रद्द यानाः आलोचनाया पात्र जुयाच्वनादिम्ह परराष्ट्रमन्त्री सुजाता कोइराला बारे मन्त्रीतय् बिस्कं बिस्कं धापू पिहांवःगु दु ।
सूचना व संचार मन्त्री नापं सरकारया प्रवक्ता शंकर पोखरेलं परराष्ट्रमन्त्री भारत मवना गठबन्धन सरकारयात छुं नं असर मलाकीगु खँ धयादीगु दु । नेपाल टेलिकमया छगू ज्याझ्वलय् ब्वति कायेत चितवन थ्यंकादिम्ह मन्त्री पोखरेलं भरतपुर विमानस्थलय् पत्रकारातनाप खँल्हाबंला यानादिसें बिरामी जुया पराराष्ट्रमन्त्री भारत मवंगु धयादिसें थुकी विवाद यायेम्वःगु धयादिल । वयेकलं थ्व दये दुनेया आन्तिरिक मामल जूगु धयादिसें घरेलु मामलां परारष्ट्र सम्बन्धय् असर मलाकीगु बिचाः प्वंकादिल ।
अथेहे शुक्रवाः हे पोखरा विमानस्थलय् संचारकर्मीत नाप खँल्हाबंला यानादिसें युवा व खेलकुद मन्त्री गणेश नेपालीं परराष्ट्रमन्त्री भारत भ्रमण रद्द याःगुलिं सरकारया ज्याखँय् असर लागू धयादिल । वयेकलं मन्त्री कोइराला भारत मवना गम्भीर गल्ती याःगु टिप्पणी यानादिल ।
थ्वस्वयां न्ह्यः उपप्रधानमन्त्री विजयकुमार गच्छदारं परराष्ट्रमन्त्री कोइराला भारत भ्रमणय् मवनाः कुटनीतिक मर्यादा उल्लंघन याःगु टिप्पणी यानादीगु खः । अथेहे परराष्ट्रमन्त्री कोइराला भारत मवंगु धासें थःगु हे पार्टी नेपाली कांग्रेसय् नं वयेकया तच्वकं विरोध जूगु खः ।
