'स्वास्थ्यं हे साथ मबीवं छु यायेगु ?'
प्रधानमन्त्री माधवकुमार नेपालया भारत भ्रमणया झ्वलय् अन्तिम ईलय् थःगु भ्रमण रद्द यानाः कडा आलोचनाया सिकार जुयाच्वनादिम्ह परराष्ट्रमन्त्री सुजाता कोइरालां थः स्वास्थ्य स्थितिया हे कारणं भारत भ्रमण वनेमफुगु खँ स्पष्ट यानादीगु दु ।
भ्रमण रद्द याःगु कारणं थःगु हे पार्टी नेपाली कांग्रेस दुने नं कडा आलोचना जुइवं शुक्रवाः छगू पत्रकार सम्मेलन यानाः वयेकलं थ्व खँ स्पष्ट यानादीगु खः । मन्त्री कोइरालां उपप्रधानमन्त्री पद मफ्वनाःगु धासें थः विरुद्ध गलत प्रचार जुयाच्वंगुलिं आपत्ति प्वंकादिल ।
वयेकलं थःम्ह प्रधानमन्त्रीया भ्रमणया निंतिं पूर्वाधार तयार यायेधुंकूगु खसां अन्तिम ईलय् स्वास्थ्य अवस्थाया कारण भ्रमण दलय् ब्वति मकायाःगु धयादिसें, 'स्वास्थ्यं हे साथ मबीवं छु यायेगु ?' धका: न्ह्यसः तयादिल । वयेकलं चिकित्सकतय् हे सल्लाह कथं आः छेँ आराम यानाच्वनाःगु धयादिल ।
मन्त्री कोइरालां प्रधानमन्त्रीया भारत भ्रमण सफल जूगु धयादिसें थ्व सरकारया विकल्प मदुगु व थ्वहे सरकारं संविधान च्वइगु दाबी यानादिल ।
