नेपाः व भारत दथुइ वाणिज्य सन्धि जुइगु
नेपाःया औद्योगिक उत्पादनयात भारतया पहुँच अप्वयेकेत सन् १९९६य् नेपाः व भारत दथुइ जूगु वाणिज्य सन्धिलय् थप सुविधात तनिगु जूगु दु ।
प्रधानमन्त्री माधवकुमार नेपालया भारत भ्रमणया मुख्य एजेण्डा जूगु सन् १९९६या वाणिज्य सन्धिलय् थप सुविधा विस्तार सहित संशोधन व परिमार्जन यायेत निगूलिं देय् दथुइ सहमति जुइवं थुकी शनिवाः वाणिज्य मन्त्रीस्तरय् हस्तक्षर जुइगु जूगु दु ।
सन्धिलय् हस्ताक्षर बुधवाः हे जुइगु धाःगु खसां नं छुं छुं बुंदाय् सहमति मजूगु कारणं हस्ताक्षर जुइमफुगु खः । प्रधानमन्त्रीया विदेश मामिला सल्लाहकार राजनकुमार भट्टराईं नं सन्धिया संशोधन समानताया हे आधारय् जुइत्यंगु व भारतं आः तक मानेमजूगु बुंदाय् सहमति यायेगु संकेत ब्यूगु जानकारी बियादिल । भारत आः तक स्वंगूगु देय् पाखें हःगु सामान नेपालं भारतयात निर्यात याये दइगु प्रस्तावित प्रावधानय् मानेमजूनि ।
न्हापा वाणिज्य सन्धिया ई न्यादँ च्वयातःगु खसाः आः उकीयात अप्वयेका न्ह्यदँ थ्यंकूगु दुसाः नेपाः व भारत दथुइया व्यापारिक कारोबारया निंतिण आः कार्यान्वयनय् दुगु नीनिगू नाकायात अप्वयेका नीन्ह्यगू थ्यंकूगु दु ।
