छुं नं सन्धि सम्झौता मयायेत माओवादीया ख्याच्वः
प्रमुख प्रतिपक्षी दल एकीकृत नेकपा (माओवादी)या संयुक्त राष्ट्रिय जनआन्दोलन नेपालं प्रधानममन्त्री माधवकुमार नेपालया भारत भ्रमणया झ्वलय् पञ्चेश्वर लगायत छुं नं न्हूगु सम्झौता मयायेत ख्याच्वः ब्यूगु दु ।
बिहीवाः येँय् क्वचाःगु संयुक्त राष्ट्रिय जनआन्दोलन नेपालया भेला लिपा जारी विज्ञप्तिलय् शान्ति सम्झौताय् छुं नं न्हूगु सन्धि सम्झौता यायेगु ईलय् राजनीतिक दलतय् सहमति जुइमाःगु खँ न्ह्यथंनातःगु धासें जनभावनाया विपरित छुं नं सम्झौता जुया अज्याःगु सम्झौता अमान्य जुइगु खँ न्ह्यथंगु दु ।
अथेहे भेलां भोक, रोग व प्राकृतिक प्रकोपं क्षति जूगु छेँजःप्रति समवेदना प्रकट यासें तच्वःगु बजाः भाः तुरुन्त नियन्त्रण यायेत व जनतायात राहत उपलब्ध यायेत सरकार नाप माग याःगु दु । जनयुद्ध व जनआन्दोलनया शहिदया छेँजःपिंत सुलभ तरिकां राहत उपलब्ध याकेत व बेपत्ता नागरिकत मालेगु निंतिं उच्चस्तरीय आयोग गठन यायेत सरकार नाप माग याःगु दु ।
मार्चाया बिहीवाः क्वचाःगु बैठकं आन्दोलनयात निष्कर्षय् थ्यंकेत पीन्यागू बुँदे घोषणापौ नं सार्वजनिक याःगु दु ।
