भारत पाखें ३२ अर्बया ग्वाहालि घोषणा
भारतं नेपाःया आर्थिक विकासया निंतिं ३२ अर्ब दां ग्वाहालि बीगू जूगु दु । न्यान्हुन्यंया भारत भ्रमणया झ्वलय् बिहीवाः प्रधानमन्त्री माधवकुमार नेपाल व भारतीय अर्थमन्त्री प्रणव मुखर्जीनाप जूगु खँल्हाबंलाय् भारतीय अर्थमन्त्री मुखर्जी उगु प्रतिबद्धता प्वंकादीगु खः ।
खँल्हाबंलाय् भारतीय अर्थमन्त्री मुखर्जीं नेपाःया प्रहरी चौकी स्थापना, राजमार्गया विकास, विराटनगर व विरगाजय् एकीकृत सुरक्षा पोष्ट स्थापना सहति रेल्वे लिंक विस्तार लगायतया ज्याया निंतिं ३२ अर्ब दां ग्वाहालि यायेगु सहमति प्वंकादीगु खः । वयेकलं वित्तीय संरचना पुनस्थापित यायेगु निंतिं न्ह्यावनाच्वंगु नेपाःया निंतिं थ्व ग्वाहालिं थप ग्वाहालि याइगु विश्वास प्वंकादिल ।
अर्थमन्त्री नापया खँल्हाबंला लिपा प्रधानमन्त्री नेपालं अनया गृहमन्त्री पी. चिदम्बरम नाप सीमापार अपराध नियन्त्रणया विषयलय् सहलह यानादीगु खः । खँल्हाबंलाय् चिदम्बरमं सीमापार अपराध नियन्त्रणया निंतिं माक्वः ग्वाहालि यायेगु प्रतिबद्धता प्वंकादीगु खः । वयेकलं निगू देय् दथुइया सुरक्षा अधिकारीत दथुइ सुरक्षा मामिला समन्वय यानाः न्ह्याः वनेमाःगु आवश्यक जूगु धयादिल ।
