न्हूगु सरकार गठनया निंतिं सहलह शुरु जुइधुंकल : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' माओवादीया नेतृत्वय् न्हूगु सरकार गठन यायेत दलत नाप सहलह शुरु जुइधुंकूगु खँ धयादीगु दु ।
बिहीवाः विराटनगर विमानस्थलय् पत्रकारात नाप खँल्हाबंला यानादिसें अध्यक्ष प्रचण्डं न्हूगु सरकार निमार्णया निंतिं बुधवाः निसें सहलह शुरु जूगु धयादिल । वयेकलं धयादिल, - 'माओवादी नेतृत्वया राष्ट्रिय सरकार धाये व न्हूगु सरकार गठनया बारे म्हिग (बुधवाः) निसें सहलह शुरु जूगु दु ।'
वयेकलं सु नाप गज्याःगु खँ जुयाच्वंगु दु धकाः धयामदीसां सहलह समारात्मक जूगु व विस्तृत रुपं खँ बिस्तारं पिहांवइगु धयादिल । वयेकलं आःया सरकार नाप कांग्रेस सभापति गिरिजाप्रसाद कोइराला नं असन्तुष्ट जुयादीगु व वयेक नाप नां याकनं खँल्हाबंला यायेगु धयादिल ।
वयेकलं प्रधानमन्त्री माधवकुमार नेपालया भारत भ्रमणया झ्वलय् परराष्ट्रमन्त्री मवंगु व भ्रमणया झ्वलय् नेपाः व भारत दथुइ व्यापार सन्धिलय् हस्ताक्षर जुइमफुगु खँ पाखें सरकार क्वदलेधुंकूगु पुष्टि जूगु धयादिल । वयेकलं माओवादी नेतृत्वया सरकारया विकल्प मदुगु धयादिसें माओवादी नेतृत्वया सरकार बिना शान्ति स्थापना व संविधान च्वयेगु ज्या जुइमफइगु दाबी यानादिल ।
