नेपालय् लगानी प्रबर्धन यायेत प्रम नेपालया इनाप
प्रधानमन्त्री माधवकुमार नेपालं शान्ति प्रकृयाया प्रगति नापं राजनीतिक व दक्वं वातावरण क्रमिक सुधार जुयाच्वंगु धायादिसें भारतीय उद्योगी व व्यवसायीतय्त नेपालय् लगानी प्रवाह यायेत इनाप यानादीगु दु ।
भारतीय उद्योग वाणिज्य महासंघ, भारतीय उद्योग परिसंघ व एसोसियट चेम्बर अफ कमर्श अफ इन्डियां बुधवाः प्रधानमन्त्री नेपालया सम्मानय् न्हूगु दिल्लीइ याःगु सहलह ज्याझ्वलय् वयेकलं आः नेपालं पुननिर्माण व पुनसंरचनाय् ध्याना केन्द्रित यानाच्वंगुलिं अन लगानीया व्यापक सम्भावना दुगुलिं लगानि प्रवर्धन यायेत इनाप यानादिल ।
अथेहे बुधवाः प्रधानमन्त्री नेपालं भारतीय राष्ट्रपति प्रतीभा पाटिल नाप नेपाः व भारत दथुइया दुइपक्षीय हितया बारे खँल्हाबंला यानादीगु दु ।
प्रधानमन्त्री नेपालं बुधवाः हे थः समकक्षी भारतीय प्रधानमन्त्री डा. मनमोहन सिंह, उपराष्ट्रपति हमिद अन्सारी, गृहमन्त्री एस. एम. कृष्णा, कांग्रेस आइया अध्यक्ष सोनिया गान्धीयात नापलानाः नेपाःया शान्ति प्रकृया, संविधान निर्माण, नेपाःया लिप्पांगु राजनीतिक घटनाक्रम व निगूया दुइपक्षीय हितया बारे सहलह यानादीगु खः ।
थ्वस्वयां न्ह्यः प्रधानमन्त्री नेपालं मंगलवाः भारतीय प्रमुख विपक्षी दल भारतीय जनता पार्टीया नेता अरुण जेट्ली, भारतीय कम्युनिष्ट पार्टीया महासचिव एबी बद्रर्धन व भारतीय कम्युनिष्ट पार्टी माक्स्रवादीया वरिष्ठ नेता सीताराम यचुरीनाप खँल्हाबंला यानादीगु खः ।
