'माओवादी नेतृत्वया मंकाः सरकारं निकास बी'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' वर्तमान सरकार मार्फत शान्ति प्रकृया, नागरिक सर्वोच्चता व संविधान निर्माण सम्भव मजूगु खँ धायदीगु दु ।
संयुक्त राष्ट्रिय जनआन्दोलन नेपालया न्हापांगु राष्ट्रिय भेलाया बुधवाः येँय् उल्लेज्या यानादिसें प्रचण्डं जनतां थःगु पार्टीयात जनमत ब्यूगुलिं दक्वं खँया निकास माओवादी नेतृत्वया मंकाः सरकारं याइगु दाबी यानादिल । अध्यक्ष प्रचण्डं माओवादीं न्ह्याकूगु आन्दोलनं थःगु पार्टीया नेतृत्वय् मंकाः सरकार गठन याइगु धयादिसें वर्तमान सरकारं जारी संक्रमणकालीन अवस्था स्यंकूगु द्वपं बियादिल ।
नागरिक सर्वोच्चताया आन्दोलनया नेतृत्व यायेगु धासें माओवादीं संयुक्त राष्ट्रिय जनआन्दोलन समितिया न्हापांगु राष्ट्रिय भेला बुधवाः सःतुगु खः । भेलां राष्ट्रिय जनआन्दोलन समितिया केन्द्रीय समितिया गठन यायेगु व जनआन्दोलनया निंतिं घोषणा पौ जारी याइगु खँ माओवादीं धाःगु दु ।
