विस्थापितपाखें राहत बहिष्कार

येँ (सन्ध्या टाइम्स)/महोत्तरी जिल्लाय् बस्तिइ खुसि दुहां वयाः द्वलंद्वः स्थानीय वासिन्दा विस्थापित जूगु दु। अनया रातु, भक्छी व कान्टुवा खुसिइ बाः वयाः जलेश्वर नगरपालिकाया लिसें झिंन्यागू गां डुबानय् लानाः द्वलंद्वः विस्थापित जूगु खँ धाःगु दु ।

विस्थापित जूपिं मध्यय् २०० म्ह ति मनूत भारतपाखे पलायन जूगु खँ नं धाःगु दु। थ्वहे झ्वलय् विस्थापित जूपिंसं रातु खुसिया बाँध तज्यानाः खुसिबाः वःगु धासें उकिया छानबिन यानाः दोषीयात कारवाही यायेमाःगु माग याःगु दु।
विस्थापित जूपिंसं सरकारं बीगु चिनी व बजिया राहत नं मकायेगु निर्णय याःगु दु ।

धुनषाय् नं खुसिबाः वयाः गुलिखे गां आः सदरमुकाम जनकपुरलिसे सम्पर्कं पिने लाःगु दु ।

उखे थौं सुथय् हेटौंडां सिमेन्ट ज्वनाः येँय् वयाच्वंगु छगः ट्रक धादिङया नौबिसेय् दुर्घटना जुयाः उकिया चालक मदन वाइवा सीगु दु। ना. १ ख ४४६२ नम्बरया उगु ट्रक भिरं कुतुं वंगु खः। उगु दुर्घटनाय् लानाः सहचालक दिपक सिंह गम्भीर घाःपाः जूगु दुसा वयात आः वासः यायेत येँय् हःगु दु ।