थौं आन्दोलनकारीतय् राष्ट्रिय भेला
येँ (सन्ध्या टाइम्स)/ प्रधानसेनापति प्रकरणय् राष्ट्रपतिं ल्ह्वंगु पलाःया विरुद्ध आन्दोलन घोषणा याःगु माओवादीं थौं आन्दोलन न्ह्याकेगु निंतिं संयुक्त राष्ट्रिय जनआन्दोलन समिति भेला यायेत्यंगु दु ।
माओवादीया ज्याकू कोटेश्वरय् जुइगु उगु भेलाया उलेज्या माओवादी अध्यक्ष प्रचण्डं यानादी। भेलाय् समितिया संयोजक डा. बाबुराम भट्टराईं समितिया नीति तथा ज्याझ्वः प्रस्तुत यानादीगु ग्वसाः दु ।
समितिइ प्रत्येक राज्य समितिया छम्ह छम्ह दुजः व जिल्लापाखें छम्ह छम्ह दुजः नं दुथ्याकातःगु दु। माओवादीं उगु समितिं थीथी राजनीतिक पार्टीयात नं दुथ्याकेगु निंतिं सहलह याइगु जूगु दु ।
थीथी राजनीतिक पार्टीतय्त नं दुथ्याकाः आन्दोलन तच्वयेकेगु कथं माओवादीं तयारी यानाच्वंगु दु। माओवादीं वंगु साउन २३ गते निसें सतक व सदन निगुलिं थासं आन्दोलन यानाच्वंगु दु ।
माओवादीया आन्दोलन लिपा सदनया बैठक न्ह्याये फयाच्वंगु मदुनिसा थौं नं सदन न्ह्याके मबीगु खँ माओवादीं धाःगु दु। थुकिं बजेट पास यायेत थाकुयाच्वंगु दु ।
