भारतय् थौं मुख्य वार्ता
येँ (सन्ध्या टाइम्स)/ न्यान्हुयंकंया भारत भ्रमणया निंतिं म्हिगः भारत थ्यंकः झाःम्ह प्रधानमन्त्री माधव नेपालं थौं भारतीय प्रधानमन्त्री डा. मनमोहन सिंहलिसे सहलह यानादीगु ज्याझ्वः दु। सहलहय् वय्कःपिनि दथुइ वाणिज्य तथा पारवहन सन्धि, जलस्रोत, सीमा सुरक्षा व निगू पक्षीय हितया बारे खँल्हाबल्हा जुइगु खँ धाःगु दु ।
थ्वहे झ्वलय् प्रम नेपालं नेपालय् न्ह्यानाच्वंगु शान्ति प्रक्रिया बारे नं भारतीय समकक्षीयात जानकारी याकादी ।
थ्व स्वयां न्ह्यः वय्कलं भारतया राष्ट्रपति प्रतिभा पाटिल, उपराष्ट्रपति महोमद हमिद अन्सारी, कांग्रेसया अध्यक्ष सोनिया गान्धी, विदेशमन्त्री एमएम कृष्णा आदिपिंत नं नापलानादी ।
थौं सुथय् प्रधानमन्त्री नेपाल महात्मा गान्धीया समाधिस्थल राजघाट वनाः श्रद्धाञ्जली प्वंकादीगु दु।
प्रमया थ्व भेटघाटया ज्याय् भारतीय पक्षया न्ह्यःने छु छु एजेण्डा पेश यायेगु धकाः सहलह यायेत वय्कः नापं भारत वंपिं नेपाःया मन्त्रीतय् दथुइ थौं न्हू दिल्लीइ हे 'क्याबिनेट बैठक' च्वंगु खँ नं सीदुगु दु ।
