नेप्से म्हिगः नं क्वय्
येँ (सन्ध्या टाइम्स)/नेपाल स्टक एक्सचेन्जय् जूगु शेयर कारोबारं लगानीकर्तातय्त हाकनं छक्वः निराश याना बिउगु दु। वाःया न्हापांगु न्हिया कारोबारय् छुं भचा सुधार जुयाः थहां वंगु खःसा वयां लिपाया कारोबार कुहां वयेवं लगानीकर्तात हाकनं छक्वः निराश जुइमाःगु दु ।
म्हिगःया कारोबारय् छगू इलय् थहां वंगु नेप्से स्टायण्डर्ड चार्टर्डया लिसें आपालं वाणिज्य बैंकया शेयर भाः कुहां वयेवं नेप्से नं कुहां वनेगु क्रमं निरन्तरता काःगु खः। छन्हु न्ह्यः प्रति कित्ता ८६/- तका कुहां वंगु स्टायण्डर्ड चार्टर्डया शेयरय् म्हिगः ७६/- तका कुहां वल। म्हिगःया कारोबारय् नेप्से मेमेगु न्हि स्वयां सामान्य शून्य दशमलव ६६ अंकं कुहां वयाः ७१५ दशमलव ३५ अंकय् थ्यंगु दु। सेन्सेटिभ नं १ दशमलव ३७ अंकं कुहां वःगु दुसा फ्लोट शून्य दशमलव ३९ अंकं कुहां वल ।
उखे म्हिगः कारोबार जूगु समुहलय् विकास बैंकया शेयरय् सामान्य भाः थहां वंगुलिं थुगु समुह छगू बाहेक मेगु दक्वं समुहया कारोबार नं कुहां वःगु दु। विकास बैंक विकास बैंक समुह ४ दशमलव ८१ अंकं थहां वनेवं ७३४ दशमलव ३ अंकय् थ्यंगु दु ।
वाणिज्य समुह ४ दशमलव २३ अंकं कुहां वयेवं ७६० दशमलव १३ अंकय् थ्यंगु दु। कारोबार जूगु समुहत मध्ये म्हिगः नं जलविद्युत समुह दकलय् अप्वः १२ दशमलव ८८ अंकं कुहां वयाः ८८३ दशमलव ३५ अंक थ्यन। फाइनान्स समुह ६ दशमलव शून्य ६ अंकं कुहां वयाः ६७३ दशमलव शून्य ३ व वीमा समुह नं शून्य दशमलव ४३ अंकं कुहां वनाः ६४७ दशमलव ३९ अंकय् थ्यंगु दु ।
म्हिगः ख्वीन्हय्गू कम्पनीया कारोबार जूसां नेप्सेया लिसें दां व शेयर कारोबार ल्याः नं कुहां वयेगु झ्वलय् छगू लाख झिंच्याद्वः च्यासः व नीनिगू कित्ता शेयरं गुंगू करोड झिंस्वंगू लाख गुइछद्वः तका दांया कारोबार जुल। छन्हु न्ह्यः छगू लाख गुइद्वः न्यासः व स्वीछगू कित्ता शेयरं झिंनिगू करोड ख्वीगू लाख चय्न्हय्द्वः तका दांया कारोबार जूगु खः ।
शेयर कारोबारय् कुहां वंसा स्टायण्डर्ड चार्टर्डं म्हिगः दांया ल्याखं दकलय् अप्वः छगू करोड न्हय्निगू लाख ख्वीनिद्वः तकाया कारोबार याःगु दु। कूल कारोबार कम्पनी मध्ये स्वाबलम्वन विकास बैंक अप्वः कमे याःगु दुसा कास्की फाइनान्सं अप्वः गुमे याःगु दु ।
