न्यान्हुया दुने सम्झौता पेश यायेत गृहयात निर्देशन
गृहमन्त्री भीम रावलं सुडानय् खटे जुयाच्वंपिं प्रहरीया निंतिं छ्वःगु आर्मड पसैमल करियर (एपीसी) न्या:गु ईलय् भ्रष्टाचार जूगु बारे उच्चस्तरीय छानबीन यानाः दोषी खनेदुसाः कारवाही यायेगु प्रतिबद्धता प्वंकादीगु दु ।
व्यवस्थापिका संसद अर्न्तगत राज्यव्यवस्था समितिया बिहीवाःया बैठकय् नेपाल प्रहरी दुने सामान न्यायेगु ईलय् भ्रष्टाचार बारे जूगु सहलहलय् गृहमन्त्री रावलं उगु प्रतिबद्धता प्वंकादीगु खः । शान्ति प्रहरी अर्न्तगत सुडानय् वंपिं प्रहरीया सामान न्याःगु ईलय् करोडौंया भ्रष्टाचार जूगु समाचार व प्रमाण सहमित समितिलय् उजुरी लायेवं राज्यव्यवस्था समितिं गृहमन्त्री सहित प्रहरीया सम्बन्धित अधिकारीतय्त सःता उकीया बारे जानकारी काःगु खः ।
समितिं सरकार व संयुक्त राष्ट्र संघ दथुइ जूगु सम्झौता व मेमेगू सहायक भ्वँत न्यान्हुया दुने समितिलय् पेश यायेत गृह मन्त्रालययात आदेश ब्यूगु दु । शान्ति सेनाय् सुडान व हाइटीलय् वंपिं प्रहरीया निंतिं सामान न्याःगु ईलय् पुलांगु, ज्या मव:गु व थिकेगु सामान न्यानाः अनियमिता याःगु खबर छुं न्हि न्ह्यः सार्वजनिक जूगु खः ।
