राष्ट्रिय सहमतिया सरकार आवश्यक : यादव
मधेशी जनअधिकार फोरमया अध्यक्ष उपेन्द्र यादवं राष्ट्रिय समस्याय समाधान यायेत राष्ट्रिय सहमतिया सरकार गठन जुइ आवश्यक जूगु खँ धयादीगु दु ।
पार्टी सुदृढिकरण अभियानया झ्वलय् बुधवाः राजविराज थ्यंकादिम्ह यादवं अन जूगु पत्रकार सम्मेलनय् न्ववानादिसें संघीय गणतन्त्र नेपाःयात न्ह्यने न्ह्याकेत राष्ट्रिय सहमतिया सरकार अपरिहार्य जूगु धयादिल । राष्ट्रिय समस्यात दक्वं राजनीतिक दलत छप्पं जुया राष्ट्रिय सहमतिया आधारय् न्ह्याः वनेमाःगु धयादिसें वयेकलं सरकार संविधान च्वयेगु व शान्ति प्रकृयायात तार्किक निष्कर्ष थ्यंकेगु लक्ष्य पाखें विमुख जूगु द्वपं बियादिल ।
अध्यक्ष यादवं भाषाया कारणं छुं नं वर्गयात हेला मयायेगु खँ अन्तरिम संविधानय् प्रष्ट व्यवस्था जुसां हिन्दी भासं सपथ काःगु कारणं सर्वोच्च अदालतं उपराष्ट्रपति परमानन्द झाया मानमर्दन याःगु द्वपं बियादिल ।
अथेहे पुलांम्ह पराराष्ट्रमन्त्री नं जुयादिम्ह यादवं प्रधानमन्त्रीया भारत भ्रमणय् परराष्ट्रमन्त्री मवंगु देय्या निंतिं दुर्भाग्य जूगु बिचाः प्वंकादिल । वयेकलं थुकीं अन्तर्राष्ट्रिय स्तरय् हे बांमलाःगु सन्देश वनीगु धयादिल ।
