कांग्रेस विधान संशोधन बारे सहलह
सत्तारुढ नेपाली कांग्रेस केन्द्रीय समितिया बैठकं विधान संशोधन व झिंनिक्वःगु महाधिवेशनया सन्दर्भय् प्रस्ताव पेश याःगु दु ।
मंगलवाः येँय् च्वंगु बैठकय् विधान संशोधन समितिया संयोजक कृष्णप्रसाद सिटौलां विधान मस्यौदा व महामन्त्री विमलेन्द्र निधिं फागुन मसान्त दुने महाधिवेशन यायेमाःगु प्रस्ताव सहितया राजनीतिक प्रस्ताव पेश याःगु खः ।
निगूलिं प्रस्तावय् बुधवाः निसें सहलह शुरु जुइगु जूगु दु । महामन्त्रीया प्रतिवेदनय् देया निगू मुख्या कार्यभार संविधान निर्माण व शान्ति प्रकृयाय् अवरोध सिर्जना जूगु धासें उकीया निंतिं पार्टीया ध्यानाकर्षण याकूगु दु ।
सेना समायोजन सम्बन्धय् विशेष समितिं पूर्णता मकाःगु, संवैधानिक समितिया सभापति पद ताःहकःगु ई तक खाली जूगु व राज्य पुनसंरचना आयेग गठन मजूगुलिं संविधान निर्माण व शान्ति प्रकृया अवरुद्ध जूगु खँ प्रतिवेदनय् न्ह्यथंनातःगु दु ।
प्रतिवेदनय् असोज दुने क्रियाशील दुजःतय् अन्तिक नां ढलय पिकायेगु, मंसिरय् गां व नगरस्तरीय अधिवेशन यायेगु, पुसय् क्षेत्रिय व माघ १५ दुने जिल्ला अधिवेशन सम्पन्न यायेगु प्रस्ताव याःगु दु ।
