जंगलय् होटल विवादया छानबिन
येँ (सन्ध्या टाइम्स)/चितवन राष्ट्रिय निकुञ्ज दुने होटल चले याके बीगु वा मबीगु धइगु बारे छानविन यायेत वंगु संसदीय पुचलं स्थानीय जनतालिसे सहलह ब्याकूगु दु ।
अन चायेकातःगु होटलया म्याद तनेगु वा मतनेगु धइगु बारे छानविन यायेत सार्वजनिक लेखा समितिं सभासद् नारायणप्रसाद दाहालया संयोजकत्वय् नीस्वंगु न्हय्म्हेसिया पुचः म्हिगः चितवन थ्यंकः वंगु खः ।
उगु छानविन पुचलं प्यन्हु तक चितवनय् च्वनाः राजनीतिक दल, मध्यवर्ती क्षेत्रया वासिन्दा, होटल व पर्यटन व्यवसायी, उद्योग वाणिज्य संघ व नागरिक समाजलिसे बिस्कं बिस्कं सहलह याइगु ज्याझ्वः दु ।
सहलह लिपा पिहां वइगु लिच्वःपाखें प्रतिवेदन दयेकाः सार्वजनिक लेखा समितियात लःल्हाइगु ज्याझ्वः दु ।
वंगु असार मसान्त कुन्हु चितवन जंगल दुने संचालन जुयाच्वंगु होटलतय्सं झिंन्यादँया निंतिं यानातःगु सम्झौताया म्याद फुइवं उगु होटलत हाकनं संचालन याके बीगु वा मबीगु धइगु खँय् विवाद ब्वलंगुलिं संसदीय समितिं उकिया छानविन याःगु खः ।
