मोबाइलया कारणं ब्वनेत पंगः
येँ (सन्ध्या टाइम्स)/ नेपालय् विकास जूगु सञ्चार सुविधाया कारणं आपाःसित फाइदा हे जूसां नं छुं छुं क्षेत्रय् धाःसा थुकिं बांमलाःगु लिच्वः नं लाकाच्वंगु दु ।
विशेष यानाः मोबाइल फोनया दुरुपयोगं क्याम्पसय् ब्वनीपिं विद्यार्थीतय्त लिच्वः लानाच्वंगु दु। क्लास जुयाच्वंगु इलय् हे विद्यार्थीतय्सं फोन याइगु व उमित मेगु थासं वइगु फोनं मेपिं
विद्यार्थी नापं शिक्षकतय्त तकं लिच्वः लानाच्वंगु दु ।
क्लास जुयाच्वंगु इलय् रिङ्गटोन न्यायेकीगु, पासापिंत एसएमएस यायेगु, लाउड स्पीकरं म्येँ न्यनेगु आदि गतिविधि विद्यार्थीतय्सं याइगुलिं ब्वंकेज्याय् लिच्वः लानाच्वंगु खँ सम्बन्धित शिक्षकतय्सं धाःगु दु । दुने कक्षा जुयाच्वंगु दइ तर पिने च्वनाः विद्यार्थीतय्सं लाउड स्पीकरं म्येँ न्यनाच्वंगु दइ । विशेषतः ११ व १२ कक्षाया विद्यार्थीतय्सं अप्वः थज्याःगु ज्या यानाच्वनी ।
उखे विद्यार्थीतय् तर्क धाःसा बिस्कं हे दु। 'मोबाइल थेंज्याःगु सञ्चार उपकरण छ्यलेगु बांलाःगु हे खः। थुकिं विद्यार्थीतय्त बञ्चित याये मजिउ। तर कक्षाय् लिच्वः लाइ कथं थुकिया दुरुपयोग धाःसा जुइ मजिउ।' मोबाइल पनेगुपाखे धाःसा सुनां पलाः ल्ह्वनाच्वंगु मदुनि ।
