प्रम नेपाल भारत प्रस्थान
येँ (सन्ध्या टाइम्स)/ न्यान्हुयंकंया भारत भ्रमणया झ्वलय् प्रधानमन्त्री माधव नेपाल थौं भारत झाल। वय्कः इन्डियन एयरलाइन्सया विमानं उखे झाःगु खः ।
वय्कःया लिसें थीथी मन्त्रालयया मन्त्री सहित ६४ म्हेसिया पुचः उखे वंगु खः । प्रधानमन्त्रीया भारत भ्रमणया झ्वलय् भारतया न्हू दिल्लीइ सुरक्षा व्यवस्था कडा यानातःगु दु। अनया विमानस्थलंनिसें प्रम च्वनीगु होटल ओबराय तकया लँय् सुरक्षा व्यवस्था कडा यानातःगु खः ।
भारतय् थ्यंकाः प्रम नेपालं थौं हे अन थीथी पार्टीया नेतात नापलानादी। कन्हय् भारतीय प्रधानमन्त्री डा. मनमोहन सिंहयात नापलानाः निगू पक्षीय वार्ता यानादी।
वय्कलं भारतीय राष्ट्रपति प्रतिभा पाटिल व उपराष्ट्रपति मोहमद हसिम अन्सारी नं नापलानादी। प्रम नेपाल ६ गते नेपाः लिहां झाइगु ग्वसाः दु ।
सुजाता मवन:
अन्तिम इलय् परराष्ट्र मन्त्री सुजाता कोइरालां धाःसा प्रम नेपाललिसे भारत वनेत अस्वीकार याःगु दु। थःत उपप्रधानमन्त्री मदयेकू धकाः वय्कः भारत मवंगु खँ सूत्रं धाःगु दु ।
