कारोबार लिसें नेप्से नं कुहां वन
येँ (सन्ध्या टाइम्स)/स्टायण्डर्ड चार्टर्ड बैंकया शेयर भाःया लिसें लगातार निन्हु तक थहां वंगु नेप्से परिसूचक उगु बैंक शेयर लिसें हाकनं कुहां वंगु दु। स्टायण्डर्डया शेयरय् प्रति कित्ता ८६/- तका कुहां वनेवं नेप्से परिसूचकया लिसें छन्हु न्ह्यःया तुलनाय् दांया कारोबारय् नं कुहां वःगु दु। वाःया न्हापांगु न्हि ५ अंकं थहां वंगु नेप्से म्हिगःया कारोबारय् ६ अंकं कुहां वःगु दु ।
नेप्से म्हिगः ५ दशमलव ९४ अंकं कुहां वयाः ७१६ दशमलव शून्य १ अंकय् थ्यंगु दु। मेमेगु उपसूचकय् सेन्सेटिभ १ दशमलव ६७ अंकं व फ्लोट शून्य दशमलव ६१ अंकं कुहां वःगु दु ।
म्हिगः जूगु कारोबारय् दक्वं समूहया परिसूचकया लिसें उपसूचकया कारोबार नं कुहां वल। कारोबार जूगु मध्ये अप्वः धइथें वाणिज्य बैंकया शेयर भाः कुहां वयेवं वाणिज्य समुह ८ दशमलव ३४ अंकं कुहां वनाः ७६४ दशमलव ३६ अंकय् थ्यंगु दु। अथे हे छन्हु न्ह्यः दकलय् अप्वः थहां वंगु जलविद्युत समुह म्हिगः दकलय् अप्वः ल्याखं कुहां वल। थुगु समुह २१ दशमलव ९७ अंकं कुहां वयाः ८९६ दशमलव २३ अंकय् थ्यन ।
मेमेगु समुहलय् विकास बैंक १ दशमलव ९३ अंकं कुहां वयाः ७२९ दशमलव ४९ अंकं थ्यंगु दु। फाइनान्स समुह ५ दशमलव ५ अंकं कुहां वयाः ६७८ दशमलव ८५ अंकय् थ्यंगु दुसा वीमा समुह शून्य दशमलव ६३ अंकं कुहां वयाः ६४७ दशमलव ८२ अंकय् थ्यन ।
म्हिगः ख्वीखुगू कम्पनीया छगू लाख गुइद्वः न्यासः व स्वीछगू कित्ता शेयरं झिंनिगू करोड ख्वीगू लाख चय्न्हय्द्वः तका दांया कारोबार जुल। म्हिगःया कारोबारय् दकलय् अप्वः नविल बैंकया प्रमोटर शेयरय् प्रति कित्ता ६०/- थहां वंगु दुसा फेवा फाइनान्सया शेयरय् दकलय् अप्वः प्रति कित्ता ४३६/- कुहां वल। कारोबार कम्पनी मध्ये दांया ल्याखं नविल बैंकं निगू करोड न्यय्निगू लाख न्हय्द्वः तका दांया कारोबार याःगु दु ।
दकलय् अप्वः पोखरा फाइनान्सं अप्वः केम याःगु दुसा दकलय् अप्वः शेयर भाः कुहां वःगु फेवा फाइनान्सं गुमे याःगु दु। कूल शेयर कारोबारय् म्हिगः नं नेशनल हाइड्रो पावरया दकलय् अप्वः ख्वीछद्वः व खुसः कित्ता शेयर न्याये-मी जुल।
