प्रधानमन्त्री नेपाल भारत प्रस्थान
प्रधानमन्त्री माधवकुमार नेपाल खुइन्याम्हेसिया जम्बो पुचःया नेतृत्व यानादिसें भारत प्रस्थान यानादीगु दु । न्यान्हुन्यंकया भारत भ्रमणया निंतिं प्रधानमन्त्री नेपालया पुचः नेपाल वायु सेवा निगमया न्हिनय् झिंनिताःया उडान नं उखे पाखे वंगु खः ।
भारत प्रस्थान यायेन्ह्यः त्रिभुवन अन्तर्राष्ट्रिय विमानस्थलया विशिष्ट कक्षय् संचारकर्मीत नाप खँल्हानादिसें वयेकलं थ्व सदभावना भ्रमण जक जूगु धयादिल । वयेकलं भ्रमणय् आर्थिक लगायत वाणिज्य एजेण्डाय् सहलह जुइगु धयादिल ।
अथेहे वयेकलं थःगु भारत भ्रमणय् निगू देय् दथुइया दुइपक्षीय हितया बारे सहलह जुइगु व थुकीं आपसी स्वापूयात न्हूगु उचाइलय् थ्यंकी धयादिल । अथेहे वयेकलं भ्रमणय् पञ्चेश्वर लगायत तःधंगू आयोजनाय् सम्झौता मजुइगु स्पष्ट यानादिल ।
भ्रमण पुचःलय् पराराष्ट्रमन्त्री सुजाता कोइराला दुथ्यागु खसां वयेक म्हः मफुगु धासें भ्रमण रद्द याःगु दु । भ्रमण पुचलय् प्रधानमन्त्रीया जहान, प्यम्ह सल्लाहकार, निम्ह सुरक्षा अधिकारी, खुम्ह मन्त्री, खुम्ह सभासद, खुम्ह व्यापारी, झिंच्याम्ह पत्रकार व उच्च सरकारी अधिकारीत दुथ्या: ।
