राष्ट्रिय सहमतिया आधारय् जक सन्धि सम्झौता : महरा
एकीकृत नेकपा (माओवादी)या नेता कृष्णबहादुर महरां नेपाः व भारत दथुइ जुइगु सन्धि सम्झौता राष्ट्रिय समहमतिया आधारय् जक जुइमाःगु खँ धयादीगु दु ।
जनसंचार अभियानं सोमवाः येँय् याःगु साक्षात्कार ज्याझ्वलय् नेता महरां वर्तमान अवस्थाय् भारत भ्रमणय् प्रधानमन्त्रीं सहमति विना छुं नं सन्धि सम्झौता यासाः देय्या निंतिं घातक जुइगु बिचाः प्वंकादिल । नापं वयेकलं छुं सन्धि सम्झौता जूसाः उकीया विरुद्ध माओवादीं आन्दोलन यायेगु ख्याच्वः तकं बियादिल ।
वयेकलं भारत भ्रमणयात प्रधानमन्त्रीं सरकारया आयु टिके यायेगु उदेश्यया कथं मखसें देयया हितय् छ्यलेमाःगु खँ बः बियादिसें लःया बाँडफाँड सम्बन्धि मुद्दा क्वमछीउतल्ले पञ्चेश्वर जलविद्युत परियोजना सम्बन्धि सहलह न्ह्याके मज्यू धयादिल । वयेकलं नेपाः विरुद्ध भारतीय भूमि व भारत विरुद्ध नेपाःया भूमि मछ्यलेमाः धइगु खँय् नं भ्रमणय् सहलह यायेमाः धयादिल ।
