'विवादास्पद सन्धिलय् हस्ताक्षर जुइमखु'
नेकपा (एमाले)या अध्यक्ष झलनाथ खनालं प्रधानमन्त्री माधवकुमार नेपालं मंगलवाः निसें यानादीगु भारत भ्रमणया झ्वलय् एकीकृत नेकपा (माओवादीं) आशंकाया कथं छुं नं विवादास्पद सन्धिलय् हस्ताक्षर मजुइगु खँ स्पष्ट यानादीगु दु ।
धौलागिरी अञ्चलस्तरीय समितिया कार्यकर्ता प्रशिक्षण ज्यझ्वः सिधेकाः बाग्लुङं पोखरा झायादिम्ह अध्यक्ष खनालं पोखराय् पत्रकारत नाप खँल्हानादिसें थ्व सदभावना भ्रमण जक जूगु धयादिसें भ्रमणया झ्वलय् छुं नं विवादास्पद सन्धिलय् हस्ताक्षर मजुइगु धयादिल ।
अथेहे वयेकलं एमालें संविधानसभा संवैधानिक समितिया सभापतिलय् उम्मेखदावरी मबीगु नं स्पष्ट यानादिल । आइतवाः एमाले नेता केपी शर्मा ओलीं एमालें नं सभापतिया निंतिं उम्मेदवारी बीगू धापू बारे पत्रकारतय् न्ह्यसःलय् वयेकलं एमालें सहमतिया लँपू अवलम्वन याःगुलिं सभापति पदया निंतिं उम्मेदवारी मबीगु व ओलीया धापू पार्टीया मखसें व्यक्तिगत जूगु टिप्पणी यानादिल ।
