भ्रमण दँ ताःलाकेत थीथी ज्याझ्वः
येँ (सन्ध्या टाइम्स)/ सन् २०११ नेपाल पर्यटन भ्रमण दँयात सफल यायेगु निंतिं थीथी मन्त्रालय व सरकारी निकायपाखें यायेमाःगु नीन्यागू स्वयां अप्वः ज्या कार्यान्वयनय् हइगु जूगु दु ।
पर्यटन वर्ष २०११ राष्ट्रिय अभियान मूल ग्वसाः खलःया थौं च्वंगु बैठकं अभियान सफलतापूर्वक ताःलाकेत अझ अप्वः मनूतय् प्रतिनिधित्व याकेगु निर्णय नं याःगु दु ।
अथे हे मूल समिति अन्तर्गत पूर्ण अधिकार दुगु कार्यान्वयन समिति नं गठन याःगु दु । पर्यटन तथा नागरिक उधयन मन्त्री एवं मूल आयोजक समितिया अध्यक्ष शरद सिंह भण्डारीया अध्यक्षताय् च्वंगु बैठकं उगु निर्णय याःगु खः ।
अथे हे थौं च्वंगु बैठकय् थीथी मन्त्रालयया सचिवतय्सं भ्रमण दँ सफल यायेत थःपिनि मन्त्रालयपाखें सम्बन्धित विषयय् पूर्ण रुपं ग्वाहालि यायेगु प्रतिवद्धता नं प्वंकूगु दु ।
बैठकय् राष्ट्रिय योजना आयोगया दुजःपिं लिसें थीथी मन्त्रालयया सचिव, सरकारी निकायया प्रतिनिधि, पर्यटन व्यवसायी संघ संस्थाया अध्यक्षपिं व पर्यटन तथा नागरिक उधयन मन्त्रालयया पदाधिकारीपिं दुथ्याःगु खः ।
