मोतिलानि ताम्राकारया लुमन्ति मुँज्या
यल (सन्ध्या टाइम्स)/ मोतिलानि सिरपाःया दाता व संरक्षक मोतिलानि ताम्र्राकार वंगु नेपाल संवत् ११२९ गुंलागा १ कुन्हु मदुगुलिं वय्कःया लुमन्तिइ म्हिगः नेपालभाषा केन्द्रीय विभागय् बिचाः मुँज्या जुल ।
ज्याझ्वलय् नेपालभाषा केन्द्रीय विभाग प्रमुख प्रेमशान्ति तुलाधरं सिरपाः निरन्तर न्ह्याकाच्वनेत छेँजःपिंपाखें ग्वाहालि जुयाच्वनीगु खँय् भलसा प्वंकादिल। मोतिलानि सिरपाः समितिया छ्याञ्जे केशरत्न शाक्यं मदुम्ह मोतिलानि ताम्राकारया बःचाहाकःगु म्हसीका न्ह्यब्वयादिल ।
सिरपाः ग्वसाःखलःया पुलांम्ह नायः प्रा. डा. सुन्दरकृष्ण जोशीं मदुम्ह मोतिलानि अस्पतालय् च्वनाच्वंगु इलय् नं सिरपाः इनेत लालायित जुयाच्वंगु खँ कनादिल। मोतिलानि ताम्राकारया काय सुवर्ण ताम्राकारं थः मां मोतिलानि ताम्राकारं स्वनाथकूगु मोतिलानि सिरपाःयात निरन्तरता बीत माःगु आर्थिक ग्वाहालि यायेगु बचं बियादिल। सिरपाः समितिया नायः हितकरवीरसिंह कंसकारया सभापतित्वय् जूगु ज्याझ्वलय् मदुम्ह मोतिलानिया लुमन्तिइ छगू मिनेट मौन धारण नं याःगु खः ।
