नेप्से थहां वनेगु क्रम जारी
येँ (सन्ध्या टाइम्स)/ताः ई लिपा सुधार जुयाः वंगु वाःया बुधवाः २७ अंकं थहां वंगु नेप्से परिसूचक थुगु वाःया न्हापांगु न्हिं नं थहां वनेगु क्रमं निरन्तरता काःगु दु। झण्डै लछि न्ह्यःनिसें वाःया न्हापांगु न्हिया कारोबारं हे कुहां वयाच्वंगु नेप्से थुगु वाःया न्हापांगु न्हि धाःसा ४ दशमलव ७५ अंकं थहां वनाः ७२१ दशमलव९५ अंक थ्यंगु दु। अथे हे सेन्सेटिभ २ दशमलव ३९ व फ्लोट शून्य दशमलव ६४ अंकं थहां वंगु दु।
लगातार कुहां वनाच्वंगु कारोबारं निराश जुयाच्वपिं लगानीकर्तात नेप्सेय् वःगु सुधारया लिसें उत्साहित जूगु नं खनेदत। कारोबार कम्पनीया ल्याखं वंगु वाःया लिपांगु न्हिया तुलनाय् कुहां वंसां शेयर व दांया कारोबार धाःसा थहां वंगु दु ।
वंगु वाःया लिपांगु कारोबारय् उपसूचक नं दक्वं थहां वंगु खःसा थुगु वाःया न्हापांगु न्हिया कारोबारय् वाणिज्य व फाइनान्स समुह बाहेकं मेगु दक्वं कुहां वंगु दु। वाणिज्य समुह १० दशमलव ५७ अंकं थहां वनाः ७७२ दशमलव ७ अंकय् थ्यंगु दुसा फाइनान्स समुह २ दशमलव शून्य ५ अंकं थहां वनाः ६८४ दशमलव ३५ अंकय् थ्यन ।
कुहां वःगु उपसूकत मध्येय् आपालं उतार चढाव जुयाच्वनीगु जलविद्युत समुह बुटवल पावरया शेयरय् प्रति कित्ता १११/- तका कुहां वनेवं दकलय् अप्वः ३७ दशमलव ६१ अंकं कुहां वयेवं ९१८ दशमलव २ अंकय् थ्यन। अथे हे विकास बैंक समुह शून्य दशलमव ८९ अंकं कुहां वयाः ७३१ दशमलव ३४ व विमा समुह शून्य दशमलव १८ अंकं कुहां वयाः ६४८ दशमलव ४५ अंक थ्यंगु दु ।
म्हिगः नेप्सेय् निगू लाख पीनिद्वः स्वसः व स्वीच्यागू कित्ता शेयर न्याये-मी जुयाः नीगू करोड नीगु लाख गुइस्वद्वः तका दां कारोबार जुल। कूल कारोबार कम्पनी मध्ये स्टायण्डर्ड चार्टर्ड बैंकया शेयरय् प्रति कित्ता २१९/ तका थहां वनेवं दांया ल्याखं दकलय् अप्वः न्यागू करोड नीच्यागू लाख स्वीप्यद्वः तका कारोबार याःगु दु। प्रति कित्ता शेयरय् २९ तका थहां वंगु नेपाल आवास विकास वित्त कम्पनीं दकलय् अप्वः कमे याःगु दुसा बुटवल पावरं अप्वः गुमे याःगु दु ।
म्हिगः नं नेशनल हाइड्रो पावरया पीन्याद्वः सछिगू कित्ता शेयर न्याये-मी जुल ।
