छवाःया कारोबारय् नेप्से २४ अंकं थहां वन
येँ (सन्ध्या टाइम्स)/थ्व वालय् नेपाल स्टक एक्सचेन्जय् जूगु शेयर कारोबारं छवाःया नेप्से समग्रय् २३ दशमलव ५६ अंकं थहां वंगु दु। वाःया न्हापांगु न्हि ६९३ दशमलव ६४ अंकं शुरु जूगु कारोबार वाःया लिपांगु न्हि ७१७ दशमलव २० अंकय् थ्यंकाः बजाः बन्द जूगु खः। थ्व वालय् मुक्कं प्यन्हु जक शेयर कारोबार जुल ।
नेप्सेय् थ्व वालय् चय्न्यागू कम्पनीया ४२९८ कारोबारं स्वीच्यागू करोड गुइस्वंगू लाख स्वीच्याद्वः दां बराबरया खुगू लाख पीनिद्व व च्यासः कित्ता शेयर कारोबार जुल। वयां न्ह्यःया वालय् ४०४६ कारोबारं न्यागू लाख झिंखुद्वः व प्यसः कित्ता शेयर न्याये-मी जुयाः नीखुगू करोड स्वीस्वंगू लाख चय्स्वद्वः तका दांया कारोबार जूगु खः। नेप्सेय् थ्व वालय् जूगु कूल कारोबारय् 'क' वर्गय् लाःगु कम्पनीया जक नीनिगू करोड पीस्वंगू लाख तका दांया कारोबार जुल। थ्व नेप्सय् जूगु समग्र कारोबारया ५७ दशमलव ६२ प्रतिशत खः ।
'क' वर्गय् लाःगु कम्पनीया कारोबार मापन याइगु सेन्सेटिभ नं वाःया न्हापांगु न्हिया तुलनाय् ९ दशमलव २३ अंकं थहां वयाः १९२ दशमलव ३० अंकय् थ्यंकाः बजाः बन्द जूग खः।
थ्व वालय् स्वंगू करोड चय्प्यंगू लाख दांया कारोबारयाःगु लिधंसाय् स्टायण्डर्ड चार्टर्ड बैंक, दकलय् अप्व? कित्ता शेयर कारोबार याःगु लिधंसाय् नेशनल हाइड्रो पावर व दकलय् अप्वः स्वसः व गुइनिगू कारोबारया लिधंसाय् बैंक अफ एशिया नेपाल न्ह्यःने लाःगु दु ।
