दिर्घकालीन असर लाइगु सम्झौता मयायेत इनाप
प्रधानमन्त्री माधवकुमार नेपालयात थीथी दलतय्सं भारत भ्रमणया झ्वलय् नेपाःयात दीर्घकालीन असर लाइगु सम्झौता मयायेत सुझाव ब्यूगु दु ।
प्रधानमन्त्री नेपालं थःगु भारत भ्रमणया एजेण्डा बारे सुझाव कायेत आइतवाः ग्वसाः ग्वःयादीगु सर्वदलीय बैठकय् संविधान सभाय् दुथ्याःगु दलतय्सं दिर्घकाली असर लाइगु सम्झौता व देय्या हित विपरीत सम्झौता मयायेत प्रधानमन्त्री नेपालयात सुझाव ब्यूगु दु । अथेहे बैठकय् एकीकृत नेकपा (माओवादी) लगायतया छुं दलतय्सं राष्ट्रिय सहमति बिना पञ्चेश्वर परियोजनाया बारे सम्झौता मयायेत इनाप याःगु दु ।
बैठक लिपाः माओवादी नेता कृष्ण बहादुर महरां न्ह्याम्ह प्रधानमन्त्रीं नं सद्धभाव भ्रमण याइगु सामान्य जूगु तर आः छुं नं राष्ट्रिय महत्वया विषयलय् राष्ट्रिय सहमति मयासें याःगु सम्झौता मान्य मजूगु धयादिल । वयेकलं पञ्चेश्वर लगायत सम्झौतात थःपिनि सहमति बिनाः मयायेत प्रधानमन्त्रीयात सुझाव बियाःगु जानकारी बियादिल ।
बैठक लिपा प्रधानमन्त्री नेपाल थःगु भारत भ्रमणया एजेण्डा बारे जानकारी बित राष्ट्रपति निवास थ्यंकादीगु खः । अन वयेकलं राष्ट्रपति डा. रामवरण यादवयात थःगु भ्रमणया एजेण्डा बारे जानकारी बियादीगु खः ।
