प्रमुख स्वंगू दल दथुइ उच्चस्तरीय सहमति आवश्यक : खनाल
संवैधानिक समितिया सभापतिलय् एमालें नं उम्मेदवारी बीफू : ओली
नेकपा (एमाले)या अध्यक्ष झलनाथ खनालं निर्धारित ईया दुने न्हूगु संविधान जारी यायेत प्रमुख स्वंगू दलत दथुइ उच्चस्तरीय सहमति आवश्यक जूगु खँ धयादीगु दु । वयेकलं निर्धारित ईया दुने संविधान जारी मजूसाः दे असफलता पाखे वनीगु जूगुलिं सफल कार्यदिशा बीत स्वंगू प्रमुख दलत दथुइ उच्चस्तरीय राजनीतिक समहिया आवश्यक जूगु खँय् बः बियादिल ।
एमाले धौलागिरी अञ्चल स्तरीय कार्यकर्ता प्रशिक्षण ज्याझ्वःया उल्लेज्या यानादिससें आइतवाः बागलुङय् अध्यक्ष खनालं न्हूगु संविधान निर्माण हे दुरगामी व महत्वपूर्ण जूगु धायादिसें माओवादी, कांग्रेस व एमाले दथुइया एकता जरुरी जूगु बिचाः प्वंकादिल ।
वयेकलं देशय् संघीय संरचना बारे बहस व सहलह आवश्य जूगु धयादिसें एक मधेश एक प्रदेशं देयात विखण्डन पाखे यंकीगु ठोकुवा यानादिल । वयेकलं माओवादी लडाकूया समायोजन मयातल्ले शान्ति प्रकृया निष्कर्षय् मथ्यनीगु खँ न्ह्यथंनादिसें सेना समायोजन विशेष समितियात याकनं पूर्ण आकार बीगू धयादिल ।
अथेहे धौलागिरी अञ्चलस्तरी कार्यकर्ता भेलाय् ब्वति कायेत बाग्लुङय् झाये न्ह्यः पोखरा विमानस्थलय् आइतवाः पत्रकारत नाप खँल्हानादिसें एमाले नेता केपी शर्मा ओलीं संवैधानिक समितिया सभापतिलय् एमालें नं उम्मेदवारी बीफुगु खँ धयादीगु दु ।
एमाले अध्यक्ष झलनाथ खनालं सभापतिलय् उम्मेदवारी मबीगु धयादीगु खँय् असहमति प्वंकादिसें नेता ओलीं अज्याःगु निर्णय एमाले दुने मजूगु धयादिल । वयेकलं सभापतिया निंतिण मेगू हे पार्टीया उम्मेदवार छ्वया एमाले मेपिनिगु न्हिप्यं जुइ चाहे मजूगु धयादिल ।
