भारतनाप विद्युत सम्झौता यायेत उद्योगी-व्यवसायीतय् सुझाव
उद्योगी व्यवसायीतय्सं भारत भ्रमणया झ्वलय् विद्युत आयात सम्बन्धी सम्झौता यायेत प्रधानमन्त्री माधवकुमार नेपालयात इनाप याःगु दु ।
आइतवाः सिंहदरवारय् प्रधानमन्त्री नेपाल नाप जूगु खँल्हाबंलाय् उद्योग वाणिज्य महासंघ, नेपाल चेम्बर अफ कमर्स लगायत व्यापारी संघसंस्थातय् पदाधिकारीतय्सं लोडसेडिङया कारण धरासायी जूगु उद्योग ख्यःयात बचेयायेत थप विद्युत आयात यायेत इनाप याःगु दु ।
अथेहे खँल्हाबंलाय् नेपालं भारत जुयाः स्वंगूगु मुलुक निकासी व अज्याःगु देय् पाखें मालसामान पैठारी यायेगु व्यवस्था मिलेयायेत नं प्रधानमन्त्रीया ध्यानाकर्षण याःगु दु । नापं नेपाः भारत वाणिज्य सन्धी पुनरावलोकन व निगू देय् दथुइया व्यापार प्रवर्धन यायेगु विषय भारत भ्रमणया मुख्य एजेण्डा दयेकेत प्रधानमन्त्रीयात सुझाव ब्यूगु दु ।
प्रधानमन्त्रीं खँल्हाबंलाय् उद्योगी व्यवसायीतय् मागया सम्बन्धय् भारतीय पक्षनाप सहलह यायेगु बचं बियादिल ।
