मन्त्रीया धापुतिं चीन सशंकित
येँ (सन्ध्या टाइम्स)/ परराष्ट्र मन्त्री सुजाता कोइरालां नकतिनि यानादीगु भारत भ्रमणं नेपाः-भारत स्वापू बांलाकूसां नेपाः-चीन स्वापू धाःसा फ्यासुका बिउगु बिचाः विज्ञतय्सं प्वंकूगु दु ।
मन्त्री कोइरालां थुगुसी यानादीगु भारत भ्रमणयात भारतीय सञ्चार माध्यमं नं अतिकं महत्व बिउगु खने दत। अनया प्रमुख पत्रिकातय्सं वय्कःया हरेक कार्यक्रमयात किपा नापं छापे यानाः महत्व बिल ।
मन्त्री कोइरालां भारत थ्यंकुन्हु हे अनया सञ्चार माध्यमलिसे खँ ल्हासें नेपाःया स्वापू चीनलिसे सिबें भारत लिसे 'अझ सती' धकाः न्ववानादीगु खः ।
नेपाःया परराष्ट्र नीति जःलाखःला देय् चीन व भारतलिसे समदूरीया स्वापू तयेगु धइगु खःसां मन्त्री कोइरालां भारतीय भूमिइ वनाः चीन व भारत नेपाःया लागिं समान खःसां सांस्कृतिक, भाषिक कारणं भारत 'अझ सती' धयादीगु खः ।
पूर्ववर्ती माओवादी सरकारं चीनलिसे स्वापू क्वातुकल धकाः भारत तम्वयाच्वंगु खःसा वर्तमान परराष्ट्र मन्त्रीपाखें थज्याःगु अभिव्यक्ति वयेवं उकियात भारतं विशेष महत्व बियाः प्रचार याःगु खः ।
नेपाःया परराष्ट्र मन्त्रीं हे थज्याःगु अभिव्यक्ति बिउगुलिं उकियात चीनं शंकाया मिखां स्वःगु खँ धाःगु दु ।
