भारत भ्रमण न्ह्यः सहलह
येँ (सन्ध्या टाइम्स)/ प्रधानमन्त्री माधव नेपालं यानादीत्यंगु भारत भ्रमणया झ्वलय् न्ह्यब्वयेमाःगु एजेन्डा बारे थौं सत्तारुढ २२ दलया बैठक च्वनेत्यंगु दु ।
प्रधानमन्त्री निवास बालुवाटारय् च्वनीगु उगु बैठकय् प्रमया एजेन्डा बारे सहलह जुइगु खँ धाःगु दु। थ्व स्वयां न्हापा नं एजेन्डायात कयाः बैठक च्वनेगु धाःसां प्रमया व्यस्ततां यानाः च्वने मफयाच्वंगु खः ।
थौं च्वनीगु २२ दलया बैठकय् संवैधानिक समितिया अध्यक्ष पदय् छु यायेगु धइगु खँय् नं सहलह जुइगु खँ धाःगु दु।
उखे थःगु भारत भ्रमण न्ह्यः नेपाःया औद्योगिक विकासया निंतिं ल्ह्वनेमाःगु मुद्दायात कयाः थौं प्रमं नेपालं देय्या उद्योग व्यवसायीत लिसे नं सहलह यानादीत्यंगु दु ।
नेपाः व भारत दथुया निगू पक्षीय वाणिज्य सन्धि, दोहोरो कर प्रणाली सहितया महत्वपूर्ण सम्झौता बारे निजी क्षेत्रया प्रतिनिधितलिसे सहलह यानादीत्यंगु खः ।
उखे प्रधानमन्त्री भारत भ्रमणय् वने न्ह्यः भ्रमण बारे माःगु व्यवस्था मिले यायेगु निंतिं छगू सरकारी पुचः थौं हे भारत वनेधुंकूगु दु। प्रमया थुगुसीया भारत भ्रमण मू एजेण्डा दिनाच्वंगु पञ्चेश्वर परियोजना हानं शुरु यायेगुपाखे केन्द्रित जुइगु खँ सम्बद्ध अधिकारीतय्सं धाःगु दु ।
