पेट्रोल मजदुरलिसे थौं वार्ता
येँ (सन्ध्या टाइम्स)/थीथी झिंन्यागू माग न्ह्यब्वयाः म्हिगःनिसें आन्दोलनय् कुहां वःपिं पेट्रोल पम्प मजदुर, सरकार व पेट्रोलियम डिलर्स एशोसियसनया दथुइ थौं श्रम मन्त्रालयय् वार्ता जुइत्यंगु दु ।
मजदुरतय्सं थःपिंत सरकारं क्वःछिउगु न्युनतम तलब बीमाःगु, ज्या यायेगु ई च्याघौ जक जुइमाःगु, ओभर टाइमया व्यवस्था जुइमाःगु, मजदुरतय् बीमाया व्यवस्था जुइमाःगु आदि माग तयाः थनिं दछि न्ह्यः एशोसियसनयात पौ बिउगु खःसां उकिया सुनुवाई मजू धासें म्हिगःनिसें हडताल शुरु याःगु खः ।
मजदुरतय् हडतालं यानाः स्वनिगःया ११५ गू पेट्रोल पम्प मध्यय् सेना, प्रहरी व साझाया स्वंगू पम्प बाहेक मेगु फुक्क हे पम्प बन्द जूगु खः ।
निजी पेट्रोल पम्प बन्द जुइवं थन आकाझाकां पेट्रोलियम पदार्थ न्यायेगु मदया वंगु खःसा चालाच्वंगु स्वंगू पम्पय् नं मनूत ताःहाकः लाइन च्वनाः पेट्रोल कायेत बाध्य जूवंगु खः।
उखे एशोसियसनं धाःसा मजदुरतलिसे थौं वार्ता यायेगु सहमति जुइक जुइकं नं उमिसं हडताल यानाः सर्वसाधारण जनतायात दुःख बिउगु खँ धाःगु दु ।
