संवैधानिक समितिया सभापतिया निर्वाचन भदौ १२ गते
संविधान सभा संवैधानिक समितिया सभापति चयनया निंतिं वइगु भदौ १२ गते निर्वाचन जुइगु जूगु दु ।
आइतवाः सिंहदरवारय् च्वंगु कार्यव्यवस्था परामर्श समितिया बैठकय् सभापति चयनया निंतिं सहमति यायेत गृहकार्य यायेगु ई आवश्यक जूगु धासें निर्वाचनया ई झिन्हु सारे यायेत दलत सहमत जूगु खः ।
बैठकय् दलया प्रमुख सचेतकतय्सं प्रधानमन्त्री माधवकुमार नेपाल भारत भ्रमणय् झायादित्यंगु व माओवादी अध्यक्ष पुष्पकमल दाहाल 'प्रचण्ड' युरोप भ्रमणय् दुगुलिं निर्वाचनया मिति सारे यायेत सभाध्यक्ष सुवास नेम्वाङयात इनाप याःगु ख: ।
सोमवाःया निंतिं क्वछीनातःगु निर्वाचन मिति दलतय् इनाप लिपा सभाध्यक्ष नेम्वाङं भदौ १२ गते सुथाय् च्याताः ईया न्हूगु निर्वाचन मिति क्वछीनादीगु खः । थौं च्वनीगु संविधानसभाया बैठकय् सभाध्यक्षं निर्वाचन तालिकाबारे औपचारि जानकारी बियादी ।
थ्वस्वयां न्ह्यः शनिवाः प्रमुख स्वंगू दलत एनेकपा (माओवादी), नेपाली कांग्रेस व नेकपा (एमालें) सभाध्यक्ष नेम्वाङयात नापलानाः सहमतिया आधारय् सभापति ल्ययेमाःगु व उकीया निंतिं गृहकार्य यायेत ई मगाःगु धासें निर्वाचनया मिति सारे यायेत इनाप याःगु खः ।
