सभामुखयात निर्वाचन स्थगित यायेत इनाप याइगु
प्रमुख स्वंगु दलं संविधानसभा संवैधानिक समितिया सभापति पदया निर्वाचन स्थगित यायेत सहमत जूगु दु ।
निर्वाचन जुइसिवें छन्हु न्ह्यः शनिवाः च्वंगु एकीकृत नेकपा (माओवादी), नेपाली कांग्रेस व नेकपा (एमाले)या मंकाः बैठकं आपसी सहमतिया निंतिं पर्याप्त ई मगाःगु धासें छवाःया निंतिं निर्वाचन सारे यायेमाःगु निष्कर्ष पिकाःगु खः ।
थ्वस्वयां न्ह्यः भदौ १ गते संवैधानिक समितिया सभापति पदाया निंतिं निर्वाचन यायेगु ग्वसाः ग्वःयातःगु खः । निर्वाचन स्थगित यायेत संविधानसभाया अध्यक्ष सुवास नेम्वाङयात इनाप यायेगु सहमति जूगु खँ बैठक लिपाः माओवादी उपाध्यक्ष नारायणकाजी श्रेष्ठ 'प्रकाशं' जनकारी बियादिल ।
वयेकया कथं प्रधानमन्त्री माधवकुमार नेपालया आसन्न भारत भ्रमण व माओवादी अध्यक्ष पुष्पकमल दाहाल 'प्रचण्ड'या युरोप भ्रमणया कारणं शीर्ष तहलय् पर्याप्त सहलह यायेमफुगुलिं निर्वाचन स्थगित यायेत्यनाःगु धयादिल ।
प्रधानमन्त्री माधवकुमार नेपाल प्रधानमन्त्री नियुक्त जुइधुंकाः समितिया सभापतिया पद रिक्त जुयाच्वंगु दुसाः थुकी आः माओवादी व कांग्रेसं थःथःगु दाबी यानाच्वंगु दु ।
