'पञ्चेश्वर बारे थप सम्झौता यायेगु अधिकार सरकार याके मदु'
एकीकृत नेकपा (माओवादी)या सचिव सिपी गजुरेलं पाचेश्वर सम्झौता राष्ट्रघती जूगुलिं उकीया निर्माण ज्या न्ह्याकीगु अधिकार वर्तमान सरकार नाप मदुगु खँ धयादीगु दु ।
शनिवाः येँय् रिपोर्टस क्लबय् जूगु ज्याझ्वलय् न्ववानादिसें नेता गजुरेलं पञ्चेश्वर बारे माओवादी नाप सरकारं छुं नं सहलह मयाःगु व सहमति नं मजूगु धयादिसें प्रधानमन्त्री नेपालयात भारत भ्रमण वनेगु ईलय् छुं नं सन्धी, सम्झौता मयायेत सुझाव बियादिल । वयेकलं अज्याःगु सहमति जुसाः माओवादीं आन्दोलन तच्वयेकीगु ख्याच्वः बियादिल ।
२०१६ सालया गण्डक व २०५२ सालया पञ्चेश्वर सम्झौता नेपाःया इतिहासया दकलये तःधंगू राष्ट्रघाती पलाः जूगु दाबी माओवादी सचिव गजुरेलं यानादिल । वयेकलं भुटानी शरणार्थी समस्या समाधानया विषयलय् भारतीय पक्षनाप सहलह यायेत सुझाव बियादिसें ल्वाभः बारे नं छुं सम्झौता मयायेत इनाप यानादिल ।
ज्याझ्वलय् उर्जामन्त्री डा. प्रकाशशरण महतं पञ्चेश्वर सम्झौता कथं ज्या न्ह्याकेगू राष्ट्रिय सहमति जुइधुंकूगु दाबी यानादिल । वयेकलं पञ्चेश्वर सम्झौता देय्या हितय् दुगु धयादिसें प्रधानमन्त्रीया भारत भ्रमणया झ्वलय् सम्झौता कथं ज्या न्ह्याकेमाःगु बारे सहमति जुइगु धयादिल ।
वयेकलं माओवादी थः सरकारय् दुगु ईलय् पञ्चेश्वर परियोजनायात सकारात्मक जूगु धाःगु व आः सरकार पिने वनेधुंकाः राष्ट्रघाती जूगु धयाः दोहोरो चरित्र क्यनाच्वंगु द्वपं बियादिल ।
