सभापतिया बारे एमालें निर्णय मयानी : खनाल
नेकपा (एमाले)या अध्यक्ष झलनाथ खनालं संवैधानिक समितिया सभापतिलय् सुयात समर्थन यायेगु धइगु बारे एमालें निर्णय मयानीगू धयादिल । तर वयेकलं सभापति पदया निंतिं एमालें दाबी मयाइगु स्पष्ट यानादिल । एमाले सहमति कथं हे सभापति चयन जुइमाःगु पक्षय् दुगु धयादिसें वयेकलं नीनिगू दल दुने नं सहमति पाखें हे सभापति चयन जुइमाःगु सहमति जूगु धयादिल ।
शनिवाः पोखराय् गण्डकी अञ्चल कार्यकर्ता भेलायात सम्बोधन यानादिसें अध्यक्ष खनालं दलत दथुइया विवादं निर्धारित ईलय् संविधान निर्माण मजुइगु खतरा अप्वयावंगु धयादिसें देय् तःधंगु दुर्घटनाय् लायेफुगु चेतावनी बियादिल । वयेकलं संविधान निमार्णयात बेवास्ता यानाः देशय् अराजक अवस्था वयेमबीत दक्वं दलत दथुइया एकता व सहमति आवश्यक जूगु धयादिल ।
प्रधानमन्त्री माधवकुमार नेपालया भारत भ्रमण मैत्रीपूर्ण जूगु धयादिसें वयेकलं छुं नं सन्धी, सम्झौता मजुइगु तर थीथी विषयलय् वार्ता व सहलह जुइगु जानकारी बियादिल ।
शुक्रवाः विराटनगरय् पत्रकारत नाप खँल्हानादिसें एमालेया नेता केपी शर्मा ओलीं अध्यक्ष खनालयात जंगबहादुर जुयाच्वंगु द्वपं बियादीगु बारे न्यंगू न्ह्यसःलय् अध्यक्ष खनालं थुकीया बारे पत्रपत्रिकाय् छुं टिप्पणी मयायेगु तर थुकीया बारे पार्टीया बैठकय् खँ तयेगु धयादिल ।
