पञ्चेश्वर परियोजनाय् सम्झौता जुइफु
प्रधानमन्त्री माधवकुमार नेपालं पञ्चेश्वर बहुउदेश्यीय परियोजना नेपाःया हितय् जुइगु धयादिसें भारत भ्रमणया झ्वलय उकीया सम्बन्धय् प्रकृया न्ह्यने यंकेगु संकेत बियादीगु दु । प्रमुख प्रतिपक्षी दल एकीकृत नेकपा (माओवादीं) भारत नाप छुं नं सन्धी सम्झौता मयायेत दबाब बियाच्वंगु ईलय् प्रधानमन्त्रीं भारत भ्रमणयया पूर्व सन्धयाय् उगु सम्झौता जुइफुगु संकेत यानादीगु खः ।
शनिवाः येँय् क्षेत्र नम्बर २ अन्तर्गत मुलपानी गाँ कमिटीं याःगु चियापान व सम्मान ज्याझ्वलय् वयेकलं उगु परियाजना मध्यमर्स्याङदी स्वयां झिगू गुणा अप्व दंकः जूगु धयादिसें सम्झौताया विरोध मयायेत माओवादीयात इनाप यानादिल । नेपाःया हित विपरीत भारत नाप छुं नं सम्झौता मयायेगु स्पष्ट यानादिसें प्रधानमन्त्री नेपालं थः नं छुं नं मयाइगु व मेपिंत नं छुं न याकेमबीगु प्रवृति त्याग यायेत माओवादीयात इनाप यानादिल ।
माओवादीं वर्तमान सरकारयात कतामरी सरकार धकाः ब्यूगु द्वपंलय् आपत्ति प्वंकादिसें वयेकलं बहुमत प्राप्त सरकारयात कतमारी ध्यायेगुसाः संविधान सभायात छु धायेगु धकाः न्ह्यसः तयादिल । माओवादी नेतृत्वया सरकारं स्वयां थ्व सरकारं उपलब्धीमुलक ज्या याःगु दाबी यानादिसें माओवादीयात थ्व सरकारया ज्या मुल्यांकन यायेत हाथ्या बियादलि ।
