राजनीतिक गतिरोध प्रति अनमिनया च्यूता:
नेपाःया जारी राजनीतिक गतिरोध व दलत दथुइ खनेदुगु असमझदारी प्रति संयुक्त राष्ट्रसंघीय मिसन अनमिनं च्यूताः प्वंकूगु दु ।
शनिवाः अनमिनया प्रमुख करिन ल्याण्डग्रेनं एकीकृत नेकपा (माओवादी)या उपाध्यक्ष नारायणकाजी श्रेष्ठ 'प्रकाश' लगायत नेतात नापलानादीगु ईलय् थ्व च्यूताः प्वंकादीगु खः । अथेहे ल्याण्डग्रेनं माओवादीया संघर्षया ज्याझ्वलं शान्ति प्रकृयाय् लाकेफूगु लिच्वःया बारे नं माओवादी नेतातय् च्यूताः प्वंकादीगु खः ।
माओवादी संविधान सभाया ज्याकूथी जूगु खँल्हांबंलाय् राजनीतिक गतिरोध अन्त्य यायेगु विषयलय् गम्भीर जुइत ल्याण्डग्रेनं माओवादी नेतृत्वयात इनाप यानादीगु खः । माओवादीं धासाः थःपिंसं न्ह्याकूगु आन्दोलनं शान्ति प्रकृया स्यंकेगु मखसें झन मजबुद याइगु खँ धाःगु दु । मेगू दलत शान्ति प्रकृयाया खँल्हाइगु तर संविधान निमाण यायेमबीगु षड्यन्त्रय् लगेजुयाच्वंगुलिं शान्ति व संविधान निर्माणया हे निंतिं आन्दोलन न्ह्याकागुलिं शंका मयायेत माओवादीं अनमिन प्रमुखयात इनाप याःगु खः ।
खँल्हाबंलाय् सेना समायोजन विशेष समिति पुनः गठनया बारे नं खँल्हाबंला जूगु खः ।
