स्वंगू दलया बैठक निष्कर्ष विहीन
संवैधानिक समितिया सभापतिया बारे सहमति यायेत प्रधानमन्त्री माधवकुमार नेपालं शुक्रवाः आव्हान यानादीगु स्वंगू दलया बैठक बिना निष्कर्ष क्वचाःगु दु ।
सिंहदरवारय् च्वंगू प्रधानमन्त्रीया ज्याकूथी च्वंगु नेकपा (एमाले), नेपाली कांग्रेस व एनेकपा (माओवादी)या बैठय् माओवादी व कांग्रेसं सभापतिया निंतिं थःथःगु दाबी मत्वतेवं सहमति जुइ मफुगु खः ।
एमालें माओवादी व कांग्रेस नाप बिस्कं बिस्कं सहलह यायेधुंका हानं प्रधानमन्त्री नेपालया संयाजकत्वय् च्वंगु स्वंगू दलया मंकाः बैठकय् कांग्रेस व माओवादीं थःथःगु अडान मत्वतेवं शनिवाः हानं सहमति मालेत मंकाः बैठक च्वनेगु कथं थौंया बैठक क्वच्येकूगु खः ।
बैठकय् एमाले पाखें प्रधानमन्त्री नेपाल, भरतमोहन अधिकारी, विष्णु पौडेल, कांग्रेस पाखें गोपालमान श्रेष्ठ, डा. रामशरण महत व माओवादीपाखें मोहन वैद्य, नारायणकाजी श्रेष्ठ 'प्रकाश' लगायत नेतातय्सं ब्वति का:गु ख: ।
