सीमा क्षेत्रया ज्यादती दिकेत भारत तयार : परराष्ट्रमन्त्री
पराराष्ट्रमन्त्री सुजाता कोइरालां भारतीय सीमा सुरक्षाबल पाखें जुइगु ज्यादती व दुर्व्यवहारया घटनात दिकेत भारत सरकार तयार दुगु खँ धयादीगु दु ।
भारतया न्यान्हुन्यंकया भ्रमण क्वचायेकाः येँय् लिहांझायादिम्ह कोइरालां शुक्रवाः अन्तर्राष्ट्रिय विमानस्थलय् संचारकर्मीत नाप खँल्हानादिसें भारत सरकार एस.एस.बी.या दुजत पाखें नेपाःया सीमा क्षेत्रय् नेपामितय्त यानाच्वंगु ज्यादती अन्त्य यायेत तयार जूगु धयादिल ।
वयेकलं भारत भ्रमणया झ्वलय् सीमा क्षेत्रया ज्यादती बारे थः भारतीय समकक्षी एस.एम. कृष्णा नापं गृहमन्त्री पी. चिदम्बर व रक्षामन्त्री ए.के. एन्टोनीया ध्यानाकर्षण यानाःगु व लिसलय् दक्वसियां तत्काल एस.एस.बी.या दुजतय्त थंज्याःगु ज्या दिकेत निर्देशन बीगू आश्वासन ब्यूगु खँ धयादिल ।
अथेहे भारतीय अधिकारीतय्सं सीमा समस्या समाधनया उपाय स्वरुप निगूलिं देय्या स्थानीय निसें केन्द्र तक सूचना आदान प्रदान यायेगु व विद्यमान मंकाः स्थायी संयन्त्रयात क्रियाशिल यायेगु सहमति जूगु धयादिल । नापं भारत पूर्व-पश्चिक हुलाकी सतक, दाङया नौमुरेया २ सय ५० मेगावाट जलविद्युत योजन लगायत बाग्मती सफा यायेगु परियोजनाय् आर्थिक ग्वाहालि यायेत तयार जूगु जानकारी बियादिल ।
मन्त्री कोइरालां भारतीय प्रधानमन्त्री मनमोहन सिंह, कांग्रेस आईया सभापति सोनिया गान्धि, भारतीय जनता पार्टीया नेता लालकृष्ण आडवाणी, समाजवादी पार्टीया नेता मुलायम सिंह यादव लगायत उच्च पदाधिकारीत नाप दुइपक्षिय हितया बारे खँल्हाबंला यनादीगु खः ।
