नेपालय् स्वाइन फ्लुया खतरा
येँ (सन्ध्या टाइम्स)/ विश्वन्यंकं न्यना वनाच्वंगु स्वाइन फ्लु ल्वय् नियन्त्रण यायेत सरकारं नेपाः-भारत थीथी नाकाय् तयातःगु हेल्प डेस्क चीकूगुलिं नेपालय् स्वाइन फ्लुया महामारी न्यने फइगु सम्भावना ब्वलंगु दु ।
विश्व स्वास्थ्य संगठनं स्वाइन फ्लुयात महामारी ल्वय् कथं घोषणा याःगु झिंच्यान्हु लिपा हे नेपालय् नं स्वाइन फ्लु खने दयेवं सरकारं भारतलिसे स्वाःगु थीथी नाकाय् हेल्प डेस्क तःगु खः ।
४५ न्हुया निंतिं धकाः दकलय् अप्वः नेपाःमित वये वनेगु याइगु रुपन्देहीया बेलहिया व मोरङया जोगवनी नाकाय् उगु हेल्प डेस्क तःगु खःसा म्याद क्वचाल धासें अनं चीकूगु खः।
भारतय् थौंकन्हय् स्वाइन फ्लु महामारी कथं न्यना वनाच्वंगु इलय् हे हेल्प डेस्क चीकूगुलिं थुकिं नेपालय् नं स्वाइन फ्लुया ल्वगित अप्वइगु खतरा दुगु खँ सम्बन्धित विज्ञतय्सं धाःगु दु ।
नेपालय् भारत जुयाः स्वंगूगु देय्या पर्यटकत नं वइगु जुयाः स्वाइन फ्लुया महामारी न्यने फइगु खतरा अप्वः दुगु खँ नं सम्बन्धित विज्ञतय्सं धाःगु दु ।
थौंकन्हय् भारतय् स्वाइन फ्लुं कयाः न्हिंन्हिं हे मनूत सिनाच्वंगुलिं थज्याःगु हे इलय् थुकथं हेल्प डेस्क चीकेगु ज्या व्यवहारिक मजूगु खँ धाःगु दु ।
