एमालेय् निरंकुशताया हाबी : ओली
नेकपा (एमाले)या नेता केपी शर्मा ओलीं पार्टी दुने निरंकुशताया हावी जुयाच्वंगु दाबी यानादीगु दु ।
विराटनगरय् शुत्रवाः स्थानीय पत्रकारत नाप खँल्हाबंला यानादिसें वयेकलं पार्टी अध्यक्ष झलनाथ खनाल थौं कन्हय् अप्वः न्ववाया जूगु प्रति असन्तुष्टी प्वंकादिसें बुटवल अधिवेशनं झलनाथ खनालयात जंगबहादुर ल्यःगु मखु अध्यक्ष ल्य:गू टिप्पणी यानादिल ।
वयेकलं पार्टीलय् छुं मतभेद दुगु स्वीकार यानादिसें उकीया समाधान यायेत पार्टी सामुहित नेतृत्वय् वंगु धयादिल । वयेकलं आः एमालेयात सुया नं स्वेच्छाचारिता व व्यक्तिगत बिचाःया आधारय् संचालन जुइ मबीगु धयादिल । वयेकलं लोकतान्त्रिक विधियात स्थापना यायेत जूगु मतभेदं पार्टीयात हे फाइदा जूगु दाबी यानादिल ।
अथेहे वयेकलं माओवादीयात सहमतिलय् वयेकगुया विकल्प मदुगु धयादिसें सत्ता व पद दुवलय् ठीक व मदुवलय् बेठीक धइगु बिचाः त्याग यायेत माओवादीयात इनाप यानादिल ।
