संवैधानिक समितिया सभापतिया निंतिं एमाले पाखें मध्यमार्गी लँपू

सत्ता नेतृत्व यानाच्वंगु नेकपा (एमालें) संवैधानिक समितिया सभापतिया निंतिं मध्यमार्गी लँपू ल्यःगु दु ।

शुक्रवाः एमालेया मू ज्याकू बल्खुइ च्वंगु स्थायी समितिया बैठकं सत्ता साझेदार नेपाली कांग्रेस व प्रमुख प्रतिपक्षी एनेकपा (माओवदी) दथुइ संवैधानिक समितिया निर्वाचनय् मध्यमार्गी लँपू ज्वनेगु निर्णया याःगु खः ।

बैठकय् न्ववापिं दुजःतय्सं संविधान निर्माण ज्यायात सहज दयेकेत राजनीति सहमति आवश्यक जूगु खँय् बः ब्यूगु खः । बैठकं माओवादीयात दुथ्याकाः यंकेगु विषयलय् सहलह यायेत नेता भरतमोहन अधिकारीया संयोजकत्वय् छगू पुच: गठन या:गु दु ।

थ्वस्वयां न्ह्यः बिहीवाः जूगु नीनिगू दलया बैठकय् संवैधानिक समितिया सभापतिया निंतिं नीनिगू दल दुनेया हे उम्मेदवारयात समर्थन यायेगु निर्णय जूगु खः ।