माओवादीं सहमतियात रणनीति दयेकाच्वंगु कोइरालाया द्वपं

नेपाली कांग्रेसया सभापति गिरिजाप्रसाद कोइरालां थम्हं सहमतिया खँल्हांसां माओवादीं उकीयात रणनीति दयेकावयाच्वंगु द्वपं बियादीगु दु ।

शुक्रवाः येँय प्रजातन्त्रवादी प्राध्यापक संघया निक्वः तःमुज्याया उल्लेज्या यानादिसें वयेकलं सहमति विपरीत माओवादीं राष्ट्रपतिया खँयात रणनीति दयेकूगु द्वपं बियादिल । वयेकलं माओवादीं उत्पात मचे यायेत स्वःगुलिं हे राष्ट्रपतिं उगु पलाः ल्ह्वने माःगु धयादिसें उकीयात मुख्य मुद्दा मदयेकेत इनाप यानादिल ।

माओवादीयात सरकारय् दुथ्याकेत उच्चस्तरीय संयन्त्रया प्रस्ताव यानाःगु धयादिसें कांग्रेस सभापति कोइरालां माओवादी अध्यक्ष इज्जतया निंतिं थः संयन्त्रय् च्वनेत तयार जुयागु धयादिल । वयेकलं दलत दथुइ विश्वासया वातावरण स्यनावनाच्वंगु धयादिसें सुमधुर स्वपू निर्माण यायेमाःगु खँ बः बियादिल ।