सहमतिया निंतिं मेगू हे विकल्प मालेमाः : पोखरेल
सूचना व संचारमन्त्री शंकर पोखरेलं सरकार व एनेकपा (माओवादी) निगूलिं पक्ष थःथःगु अडानय् कायम जूगुलिं सहमतिया निंतिं मेगू हे विकल्प मालेमाःगु खँ धयादीगु दु ।
बिहीवाः पत्रकार महासंघ बारा शाखा भवनया उल्लेज्या यानादिसें मन्त्री पोखरेलं निगूलिं पक्षं आःयात राष्ट्रपति प्रकरणया विषयात थाँति तयाः संविधान निर्माण, सेना समायोजन, राज्यपुर्नसंरचना लगायतया विषयलय् सहमति यायेमाःगु बिचाः प्वंकादिल । वयेकलं झिंनिगू बुँदे सहमति याःगु ईलय् दक्वं छप्पं जूगु खँ न्ह्यथंनादिसें देय्यात गति बीत हानं छक्व छप्पं जुइमाःगु खँ बः बियादिल ।
सरकारया प्रवक्ता नं जुयादिम्ह मन्त्री पोखरेलं राष्ट्रपतिं नीनिगू दलया सुझाव कथं थःगु कर्तव्य जक पूवंकादीगु धयादिसें माओवादीया आन्दोलन समस्याया समाधान मखसें देया निंतिं समस्या जूगु द्वपं बियादिल ।
ज्याझ्वलय् मन्त्री पोखरेलं सरकारं ह्येत्यंगु विशेष सुरक्षा ऐन छुं नं दल व समुदाय विषेशयात लक्षित यानाः महःगु धयादिसें राज्ययात बल्लाकेत सरकारं थ्व ऐन ह्येत्यनाःगु धयादिल । वयेकलं दक्वं पक्ष नाप व्यापक सहलह यानाः जक थ्व ऐन लागू यायेगु नं धयादिल ।
