माओवादी आन्दोलनं शान्ति प्रकृयाय् असर लाकीमखु : कोइराला
नेपाली कांग्रेसया सभापति गिरिजाप्रसाद कोइरालां एनेकपा (माओवादी)या आन्दोलनं शान्ति प्रकृयाय् छुं नं असर मलाकीगु खँ धयादीगु दु ।
येँ-मोरंग सम्पर्क मञ्चं बिहीवाः याःगु चियापना ज्याझ्वःलय् वयेकलं संविधान निर्माण व शान्ति प्रकृया बारे च्यूताः प्वंकेत आवश्यक मजूगु धयादिल । माओवादी आन्दोलनं संविधान निर्माणय् गुकथंया असर लाकीले धकाः संचारकर्मीतय्सं न्यंगू न्ह्यसःया लिसःलय् वयेकलं संविधान ईलय् हे निर्माण जुयां त्वतिगु दाबी यानादिल । वयेकलं आःया राजनीतिक अस्थिरतां संविधान निर्माण प्रकृयाय् छुं गतिरोध उत्पन्न मयाइगु ठोकुवा नं यानादिल ।
सभापति कोइरालां देयया हितया निंतिं युवाः पुस्ता न्ह्यावनेमाःगु धायदिसें उकीयात ग्वाहालि यायेत थः दृढ जूगु धयादिल । यक्व दलत दुगुलिं थीथी बिचाः वइगु स्वभाविक जूगु धयादिसें संविधान निर्माण प्रकृयाय् युवातय्त अग्रणी भूमिका निर्वाह यायेत इनाप यानादिल ।
