संवैधानिक समितिइ नीनिगू दलपाखें हे सभापति दयेकेगू सहमित
उपराष्ट्रपतियात खस भासं सपथ कायेत इनाप
सत्ता साझेदार नीगू दलं नेपाली कांग्रेसयात हे संवैधानिक समितिया सभापतिलय् निर्वाचित यायेगु सहमति याःगु दु ।
प्रधानमन्त्री निवास बालुवाटारय् बिहीवाः च्वंगू नीनिगू दलया बैठकं संवैधानि समितिलय् नीनिगू दल दथुइया पार्टी पाखें हे सभापति चयन यायेगु सहमति जूगु खः । संवैधानिक समितिइ नेपाली कांग्रेस व एकीकृत नेकपा (माओवादीं) आः तक सभापति पदया निंतिं दाबी यानाच्वंगु दु ।
अथेहे बैठकय् नीनिगू दलं उपराष्ट्रपति परमानन्द झायात खस भासं शपथ ग्रहण यायेत इनाप याःगु दु । संविधान संशोधन मजूतल्ले उपराष्ट्रपितं खास भासं हे सपथ कायेमाःगु निष्कर्ष पिकाःगु खः । बैठकं संविधान संशोधन यायेमाःगु निष्कर्ष पिकासां संविधान संशोधन मजूतल्ले सर्वोच्च अदालतया सम्मान यासें उपराष्ट्रपतियात खस भासं सपथ कायेत इनाप याःगु खः ।
बैठकय् प्रधानमन्त्री माधवकुमार नेपालया भारत भ्रमणया एजेन्डा बारे सामान्य सहलह जुसां ई अभावया कारणं शुक्रवाः च्वनीगु नीनिगू दलया बैठकय् थुकीया बारे सहलह यायेगु निर्णय याःगु दु ।
