जि जातीय विरोधी मखु : राष्ट्रपति
येँ (सन्ध्या टाइम्स)/राष्ट्रपति डा. रामवरण यादवं थः जातीय स्वशासनया विरोधी मखु धयादीगु दु। म्हिगः नेवाः स्वायत्त राज्य मंकाः संघर्ष समितिया पदाधिकारीतय्सं बिउगु ज्ञापनपत्र लःल्हाना कासें राष्ट्रपति यादवं उगु बिचाः प्वंकादीगु खः ।
नेवाःतय् संस्कृति हे नेपाःया दकलय् उत्कृष्ट खः धासें वय्कलं नेवाः संस्कृति व संस्कारयात राज्यं हे उच्च सम्मान बीमाःगु बिचाः नं प्वंकादीगु खः ।
राज्य पुनर्संरचना यायेबलय् राष्ट्रिय सार्वभौमसत्ता व राष्ट्रिय अखण्डताय् लिच्वः लाके मजिउ धइगु थःगु बिचाः खः धासें वय्कलं तर सांस्कृतिक रुपं सम्पन्न नेवाःतय् अधिकार सुरक्षित जुइ कथंया राज्य संरचना जुइमाःगु बिचाः नं प्वंकादीगु खः ।
नेवाः स्वायत्त राज्य मंकाः संघर्ष समितिया सचिव नरेश ताम्रकारया नेतृत्वय् वंगु उगु पुचलय् सभासद्पिं बुद्ध साय्मि, तीर्थराम डंगोल व नेवाः देय् दबूया संरक्षक मल्ल के. सुन्दरपिं दुथ्याःगु खः ।
